Прыхільнікі кампаніі «Дэпутатаў - да адказу» зь Віцебску распачалі кампанію «Віцебчукі супраць высокіх бардзюраў!». Яны вырашылі праверыць, ці адпаведаюць нормам пешаходныя пераходы і ходнікі Віцебску. Згодна з гэтымі нормамі, вышыня бартавых камянёў праезнай часткі ў месцах скрыжаваньня з ходнікамі і роварнымі дарожкамі павінна быць ад 2,5 да 4 цантымэтраў.

На думку актывістаў кампаніі, неабходнай прыкметай сучаснага гораду зьяўляецца безбар’ернае асяродзьдзе. Яны ўпэненыя: раварысты, інваліды, мамы і бабулькі зь дзіцячымі вазкамі скажуць ім дзякуй. Каб зрабіць маніторынг у межах кампаніі больш эфэктыўным, яго арганізатары зьвярнуліся па дапамогу да жыхароў гораду, каб тыя зрабілі свой унёсак у справу - пазначылі на інтэрактыўнай мапе месцы, дзе бардзюрныя камяні занадта высокія.